用呢五個方法練琴,包你練快100倍(一)

以前嘅我一日練幾個鐘，不停鋤歌，彈到悶就換歌。自我感覺良好架，覺得自己練到好熟，合埋眼都識彈

之後出事啦….表演嘅時候咪狂彈錯音，又memory slip炒到停晒。最慘嘅係，放低兩個星期就唔記得晒啲音

嗰陣第一個反應就會覺得自己唔適合表演

睇返轉頭，其實只係我唔識點練琴。而家嘅我，就算冇練幾個月嘅歌都可以背譜表演出嚟。呢個就係正確練琴嘅心態同方法

表演俾人本身就係一個會令人腎上腺素飆升嘅活動，表演俾live audience實係興奮啲。

就算趙成珍都會緊張，喺蕭邦大賽嘅時候，手都震埋

但佢一樣彈得到，唔會甩，唔會亂彈，因為佢練琴嘅方法唔係死練

呢篇文適文任何人睇。

• 如果你冇玩開音樂，睇完你會了解多左練琴究竟係一回咩事。

• 如果你初學鋼琴，咁呢篇文你可能要bookmark左佢，得閒就重睇下，因為要將呢啲principles完全融入你嘅練習，唔係一朝一夕嘅事。一唔小心就會跌返入新手地獄，浪費寶貴嘅練習時間。

• 如果已經好advanced，都歡迎你用fresh eye睇下，可能有啲你忽略左/冇接觸過嘅ideas會幫到你。又或者你覺得我講得幾好，咁你可以直接share出去，唔使講多次haha。如果覺得我有咩可以講得再好啲都歡迎你話畀我知

好，入正題

呢度係5個練琴時你應該諗嘅方向

1. 腦入面要先有音樂

2. 框架/故事性

3. 輕重

4. 動作

5. 長線

1. 腦入面要先有音樂.

如果喺演奏嘅時候，你腦入面冇一個明確想表達嘅感覺/意境同埋對應嘅聲音，咁你只係㩒緊音，唔係演奏緊音樂。

咁樣嘅話，你嘅表演只會淨低音符。

你會好驚彈錯音。你同聽眾都唔享受個表演。大家想快啲完。

因為除左彈中音，你嘅表演冇其他嘢

練琴唔係一個機械過程，唔係一味死練就得

練琴係一個解難嘅過程，需要創意

目標越清晰，達成目標嘅手段就越明顯

最大嘅問題係點樣呈現腦入面嘅音樂出嚟

首先，你要有idea首音樂想表達嘅嘢係咩

呢個係音樂最基本、最重要嘅元素，亦係我將佢放喺第一點嘅原因。之後幾點亦係要建基於呢一點

我地唔需要揾到絕對正確嘅答案，但我地需要有一個合理，合邏輯嘅interpretation

而呢個interpretation對每個人嚟講都唔同，亦冇標準答案

就好似Chopin ballades咁，叫敍事曲，但冇話畀你聽係咩故事，就係留畀你想像

今日開始，練習嘅時候唔好諗成係死命重複/練手指

你係一個科學家，腦入面有無窮無𧗊嘅諗法，但未必樣樣work。

而你嘅任務係要揾出咩intepretation對你嚟講係最好聽。

先詮釋後演繹

音樂如果冇左演奏家，佢就只係一張紙

你可能會話:彈琴唔係要彈啲人地想聽嘅咩?

但其實每個人心入面有自己嘅世界。我地可以透過音樂畀人睇到內心世界，其實係一件好美好，好神奇嘅事嚟。

咁實際上要點做呢? 我喺呢個threads都輕輕過講下

可能有人會話: 唔得喎!啲音都未練熟，點諗咁多嘢呀?

但其實，由第一日就要開始諗musicality先會學音學得快同熟

有冇發覺好聽嘅旋律總係特別入腦?

你彈嘅音樂唔好聽，個腦又點會覺得佢好重要呢?

仲有，你練琴嘅時間遠喺台上嘅時間多。唔好再無意義地折磨自己。

由Day 1就開始享受練習嘅過程啦!

彈難聽+一模一樣嘅旋律10次

同彈好聽+有記憶點嘅旋律10次

個體驗同結果都差天共地。你而家識揀啦?

音樂係一種藝術，佢嘅冇咩實際嘅用途，唯一係為左美感/靚/好聽

而點解人咁鍾意音樂?

點解人會喺聽音樂嘅時候感動?

點解你會想學一首音樂?

以上全部嘅答案係建基於好聽

既然我地唯一嘅目標係要首音樂好聽，咁我地唔應該晒時間去做冇靈魂嘅死練。

揾音係要做，但揾到之後就要盡快move on去下個stage(講緊幾分鐘內嘅事)。

記住! Musical嘅練習先係最有效。唔好再咁傻，個腦熄機咁去”㩒熟啲音”

相反，試下唱左出嚟先。講緊唔係要唱到好靚聲咁樣，

但你要令每句phrase有鮮明嘅character, 例如係

• 活潑 (vivace)

• 平靜 (calmato)

• 歌唱 (cantabile)

• 莊嚴 (grave)

咁要點做呢? 最基本係要唱到啱拍子、articulation、phrasing。

人嘅腦好鍾意偷懶，所以我地好容易會以為自己好清楚自己做緊乜。

而唱出嚟就係冇得蒙混過關，係一個迫你個腦轉嘅過程

你要好肯定咁唱到出嚟，你先可以話自己決定好要點彈

咁你先有本錢去judge你彈出嚟嘅係咪你想要嘅嘢

好多時，composer寫嘅音符/節奏/marking而已經交代左/暗示左個感覺。

你只要跟足個節奏，輕重拍，個音樂就會自己出嚟。feel到之後捉住個感覺，加少少想像力就得

例如係Ravel嘅Alborada del Gracioso(小丑的晨歌)嘅開頭，佢mark左’sec’ 即係乾，冇pedal嘅意思。佢啲音mark左第1,4重拍，同埋右手keep住有arpeggiation。我會將左手諗成係個小丑喺到跳緊舞，右手諗成係佢彈緊佢未tune好嘅吉他，係好一個滑稽同歡樂嘅氣氛。

咁我練習嘅時候就係要serve呢個畫面，而唔係漫無目的咁runthrough，希望有一日突然會彈到。

咁樣練琴嘅話，練習嘅趣味性會高好多，目標亦會明確好多，進步亦會快好多

今日講住咁多先。大家今個星期實驗下用唔同嘅approach練琴，相信一定會好好玩!

(待續…)

下星期再見! 之後每星期更新，分享更多有用tips，等大家練琴練得更有效率，更有滿足感!

Adam