影響你學琴速度最關鍵嘅因素 想練琴更有效率、更開心就睇呢篇

你知唔知鋼琴高手練琴同一般鋼琴學生或者鋼琴新手有咩分別？點解高手學歌可以咁快？

當然，高手受過嘅音樂教育更全面，亦都有更多經驗，令到佢哋對樂曲嘅理解更深，一嚟就可以掌握樂曲嘅精髓，咁會令到佢好清楚音樂嘅目的，亦都令佢有機會達到佢嘅目的。（如果冇目的，咁達成目的係冇可能嘅事。）

但今日先撇除音樂性，單從學音嘅角度分析吓究竟高手練琴同一般人有咩分別

最關鍵嘅分別，就係鋼琴高手練琴時犯錯嘅次數極低。

有冇統計過自己平均彈錯幾多次先會彈返啱? 呢一個數字話到俾你知你屬於高手/進階定新手。

你唔好覺得我講緊廢話喎，好多人真係唔知㗎，尤其係練緊琴嗰陣更加冇留意。

好多人見到一隻新歌，淨係不停咁sight read, 根本唔知自己彈錯音，或者就算彈錯會迷信地重複，希望下次就會彈得啱。

但其實呢一種諗法同迷信冇分別。練琴唔係練手指，而係訓練大腦有效地控制肌肉。如果冇刻意去改正自己嘅錯誤，咁好容易就會將錯誤嘅動作變成習慣。

呢個亦都係點解我唔建議每次練琴練太耐。

著名鋼琴家Josef Hofmann係佢本書講過：

“In a tired condition of mind and body we are very apt not to notice the formation of bad habits, and since "to learn means to form correct habits of thinking and doing" we must beware of anything that might impair our watchfulness as to bad habits. The greatest persistence cannot turn a bad habit into a virtue.” - Josef Hofmann, from his book “Piano Questions Answered”

練琴其實就係一個建立習慣嘅過程。講緊嘅習慣，唔只係生理上嘅習慣，仲有諗法上嘅習慣。如果你重複錯嘅動作，其實你係練緊錯嘅動作同埋諗法。練琴時彈得正確嘅次數越多，當然就越能夠建立好嘅心理同生理上嘅習慣。

咁但係點樣先可以確保我哋唔會練習錯嘅動作呢？喺我俾答案你之前，我哋一齊睇吓唔同程度嘅人會點練琴。

例如抽Bach Invention no. 8 in F嘅呢一段嚟睇，如果大家有機會分別見到三位唔同程度嘅musician, 你哋可能會見到呢啲嘢：

比較初階，或者自學嘅學生多數會直接接雙手一齊sighread, 但彈錯晒，然後不停試到好似啱啲，但彈極都快唔到，或者彈得好辛苦，錯音比較多，而且彈得唔好聽。就算練左好多日，星期，甚至月，節奏同音色都未如理想。

比較進階嘅鋼琴學生，可能講緊八級/演奏級程度嘅學生，可能會分手練幾次，之後好慢地合手彈，但聽落唔太好聽。之後重複幾次，希望會變得更順更好聽，但會彈錯少少音，不過唔太覺。之後開始諗多啲expression，不斷重複，直到發現好耐都練唔好，先至扚起心肝重新用正確方法，仔細聽每個聲部做緊乜，一聽到有錯就即刻改正，一覺得冇信心就集中𡁻嗰個位。

鋼琴高手，講緊鋼琴家等級嘅人，第一下就睇到重要嘅音嘅邊（左手2nd and 3rd beat嘅低音 - G,F,G,E），基本上sightread到出嚟, and with musicality。佢可以喺第一次彈就發現彈得唔順嘅位，例如係3rd beat 1手指接落下個bar第一個音嘅moment，同埋first beat嘅頭三個音，集中練幾次，之後就可以用一個不太快嘅速度彈到整個bar，然後再重複一兩次就可以去到Performance Tempo。

又或者有啲scales/arpeggios嘅 thumb under，佢哋都會集中訓練thumb under嘅時刻，試幾次就彈得好好，而一般人就練極都係唔太順/平均。

就算我哋唔係concert pianist, 我哋一樣可以借鑒佢哋學嘢嘅方式，令自己學琴得更好，更有效率，更有滿足感。

我哋由Concert pianist練習嘅方法可以學到幾樣令你練琴更有效率嘅方法

1. 揾+聽最重要嘅音

2. 抽最難嘅位出嚟練

3. 由慢嘅速度開始，每次唔好加速太多

4. 高度集中，避免犯錯

送多一個貼士俾大家：the rule of stepping down. 呢個係我自己發明嘅練琴心法。我發現自己係往往練得最好嘅sessions, 都係我有遇到困難嘅時候將難度降低，先再慢慢將難度增加。難道降低可以有好多多種，例如練scale/arpeggios時可以係彈慢啲，或者拍子機同一個速度之下，我哋由彈四粒音(semiquavers)變做一粒音(quarter notes)，之後先彈兩粒音（quavers), 然後變三連音（triplets)，再彈返四粒音(semiquavers)嘅時候你就會發現順咗好多，因為你終於俾咗你嘅大腦足夠時間去處理呢啲複雜嘅資訊。

今個星期練琴，試吓

1）聽多啲自己咩位會出錯，然後立即抽出嚟改正

2）rule of stepping down. 慢慢練。slow is smooth and smooth is fast.

唔好睇少呢啲小tips呀。我地練琴嘅時候太多資訊要處理，好多時都唔會有心神去諗自己做緊嘅行動有冇效率，一個唔留神就冇左一個鐘，但又練唔到啲咩出嚟。幸福感唔多，反而挫敗感仲多。人生好短架咋。相信大家除左練琴仲有好多其他嘢做。如果要花寶貴嘅時間嚟練琴，我地千奇唔好畀佢白白流走。我喺度就係為左幫你練得更有效率，更有滿足感!

如果你可以一星期就練好一隻歌，咁對比起一個月先練好嘅人你就可以練四倍咁多歌，而你學每隻歌嘅過程亦會有獨特嘅得着，呢啲得着都會令你日後學得更快。所以唔好睇少你嘅每一個習慣。呢啲習慣畀到你嘅利息會複式增長(compound)，帶你去到你從來冇諗過嘅地方。

如果你睇到呢度，十分多謝你嘅時間。希望你可以快啲學到鍾意嘅歌，彈畀自己聽，彈畀身邊嘅人聽，彈畀唔識嘅人聽，令呢個世界多啲美好，少啲不快。

如果有咩問題或者想我講嘅topic，歡迎IG/threads dm/comment或者email [email protected] 話我知

仲未訂閱就快啲啦!下篇newsletter見